|
Mai i te
whakamanatanga o te Ture Reo Māori 1987 i te reo Māori, i tū ai Te Taura
Whiri i te Reo Māori, kotahi anō te whakamātautanga a Te Taura Whiri i
te pai o te tangata ki te whakamāori, ki te whakapākeha kōrero ā-tuhi,
ā-waha i te tau, ka mutu ki te kore e tapeke āna māka ki te 80% neke atu
mō te katoa o aua whakamātautau, kua hinga ia. I runga i te whakapono a
Te Taura Whiri i te Reo Māori kua eke ki te wā e tirohia anō ai tēnei,
kua whakakorea ngā whakamātautau mō tēnei tau, arā te tau 2010.
I tēnei wā
e whakaaro ana Te Taura Whiri i te Reo Māori kia motuhake te
whakamātautau mō te ao mātauranga, kia motuhake anō mō te ao pāpāho, mō
te ture, mō te hauora, mō te rāngai tūmatanui, mō te whakapākeha kōrero
ki te manuhiri tūārangi i te marae, mō te aha, mō te aha. Ko te whāinga
ia, ko te noho mātanga o tēnā, o tēnā kaiwhakamāori/kaiwhakapākehā ki
ngā momo whakamāoritanga e pai ana ki a ia. Otirā ko te painga atu
mehemea ka puta te tangata kotahi i ngā momo whakamāoritanga katoa.
I te mea
ka pau tēnei tau ki te āta wānanga me te āta whakatakoto i ngā
whakahounga nei, hei waenganui rawa pea o te tau 2011, ka haere anō ngā
whakamātautau.
Ko te
tūmanako kāore tēnei e kaha whakararu i te hunga e hiahia ana ki te whai
i ngā whakamātautau i tēnei tau, heoi, kua tae ki te wā e tirohia anō ai
ko wai mā te hunga e tahuri mai ana ki te kaupapa ināianei, ka
whakahāngai ai i ngā whakamātautau ki a rātou.
|
